ਨਕਲੀ ਜੱਜ ਨੇ ਅਸਲੀ ਜੱਜ ਨੂੰ ਫਸਾਇਆ ਪਿਆਰ ‘ਚ, ਪੋਲ ਖੁੱਲੀ ਤਾਂ ਦਿੱਤੀ ਅੰਡਰਵਰਲਡ ਦੀ ਧਮਕੀ

ਉੱਤਰ ਪ੍ਰਦੇਸ਼ ਦੇ ਮੇਰਠ ਤੋਂ ਇੱਕ ਹੈਰਾਨ ਕਰਨ ਵਾਲੀ ਖਬਰ ਸਾਹਮਣੇ ਆਈ ਹੈ। ਇੱਥੇ ਇੱਕ ਮਹਿਲਾ ਜੱਜ ਮਹਾਰਾਸ਼ਟਰ ਦੇ ਇੱਕ ਨੌਜਵਾਨ ਨਾਲ ਇੰਸਟਾਗ੍ਰਾਮ ‘ਤੇ ਦੋਸਤ ਬਣ ਗਈ। ਨੌਜਵਾਨ ਨੇ ਆਪਣੇ ਆਪ ਨੂੰ ਵੀ ਜੱਜ ਦੱਸਿਆ। ਹੌਲੀ ਹੌਲੀ ਦੋਹਾਂ ਦੀ ਦੋਸਤੀ ਗੂੜ੍ਹੀ ਹੁੰਦੀ ਗਈ। ਫਿਰ ਮੁਲਾਕਾਤਾਂ ਦਾ ਸਿਲਸਿਲਾ ਸ਼ੁਰੂ ਹੋ ਗਿਆ। ਇਸ ਦੌਰਾਨ ਜਦੋਂ ਮਹਿਲਾ ਜੱਜ ਨੂੰ ਉਸ ਦੀ ਅਸਲੀਅਤ ਦਾ ਪਤਾ ਲੱਗਾ ਤਾਂ ਉਸ ਨੇ ਨੌਜਵਾਨ ਨਾਲ ਦੋਸਤੀ ਤੋੜ ਦਿੱਤੀ। ਪਰ ਨੌਜਵਾਨ ਇਹ ਗੱਲ ਬਰਦਾਸ਼ਤ ਨਾ ਕਰ ਸਕਿਆ। ਉਸ ਨੇ ਮਹਿਲਾ ਜੱਜ ਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਸ ਤੋਂ ਇਲਾਵਾ ਉਸ ਨੇ ਉਸਦੀਆਂ ਅਸ਼ਲੀਲ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕਰ ਦਿੱਤੀਆਂ।

ਮਹਿਲਾ ਜੱਜ ਦੀ ਮਾਂ ਦੀ ਸ਼ਿਕਾਇਤ ’ਤੇ ਪੁਲਿਸ ਨੇ ਮੁਲਜ਼ਮ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜੱਜ ਦੀ ਮਾਂ ਨੇ ਰਿਪੋਰਟ ‘ਚ ਦੱਸਿਆ ਕਿ ਕੁਝ ਸਮਾਂ ਪਹਿਲਾਂ ਉਸ ਦੀ ਬੇਟੀ ਦੀ ਇੰਸਟਾਗ੍ਰਾਮ ਆਈਡੀ ‘ਤੇ ਹਿਮਾਂਸ਼ੂ ਨਾਂ ਦੇ ਨੌਜਵਾਨ ਦੀ ਫਰੈਂਡ ਰਿਕਵੈਸਟ ਆਈ ਸੀ। ਦੋਸ਼ੀ ਨੇ ਆਪਣੇ ਆਪ ਨੂੰ ਸਿਵਲ ਜੱਜ ਲਿਖਿਆ ਹੋਇਆ ਸੀ। 14 ਦਸੰਬਰ ਨੂੰ ਉਸ ਨੇ ਦੱਸਿਆ ਕਿ ਉਹ ਹੈਦਰਾਬਾਦ ਦਾ ਵੱਡਾ ਕਾਰੋਬਾਰੀ ਹੈ। ਫਿਰ ਉਸਨੇ ਉਸਦੀ ਧੀ ਦੇ ਸਾਹਮਣੇ ਵਿਆਹ ਦਾ ਪ੍ਰਸਤਾਵ ਰੱਖਿਆ।

ਉਸ ਨੇ ਉਸਦੀ ਬੇਟੀ ਦਾ ਬਾਇਓਡਾਟਾ ਮੰਗਿਆ। ਜਿਸ ਤੋਂ ਬਾਅਦ ਉਸ ਨੇ ਵਟਸਐਪ ‘ਤੇ ਬਾਇਓਡਾਟਾ ਭੇਜ ਦਿੱਤਾ। ਇਸ ਤੋਂ ਬਾਅਦ ਦੋਸ਼ੀ ਨੇ ਉਸਦੀ ਬੇਟੀ ਨੂੰ ਹੈਦਰਾਬਾਦ ਅਤੇ ਮੁੰਬਈ ਆਉਣ ਲਈ ਕਿਹਾ। ਮੁਲਜ਼ਮ ਨੇ ਆਪਣੇ ਕਾਰੋਬਾਰ ਨਾਲ ਸੰਬੰਧਤ ਦਸਤਾਵੇਜ਼ ਅਤੇ ਵੀਡੀਓ ਭੇਜੇ। 21 ਦਸੰਬਰ, 2024 ਨੂੰ, ਉਸਨੇ ਆਪਣਾ ਬਾਇਓਡਾਟਾ ਭੇਜਿਆ, ਜਿਸ ‘ਤੇ ਹਿਮਾਲਿਆ ਮਾਰੂਤੀ ਦੇਵਕਾਤੇ ਦਾ ਨਾਮ ਲਿਖਿਆ ਹੋਇਆ ਸੀ।

ਪਰਿਵਾਰਕ ਮੈਂਬਰਾਂ ਨੂੰ ਨਾਲ ਨਹੀਂ ਲਿਆਇਆ
ਮਹਿਲਾ ਜੱਜ ਦੀ ਮਾਂ ਮੁਤਾਬਕ ਦੋਸ਼ੀ ਨੇ ਫਿਰ ਦੱਸਿਆ ਕਿ ਹਿਮਾਂਸ਼ੂ ਅਤੇ ਹਿਮਾਲਿਆ ਦੋਵੇਂ ਉਸ ਦੇ ਨਾਂ ਸਨ। 27 ਦਸੰਬਰ ਨੂੰ ਉਸਨੇ ਮਿਲਾਣ ਕਰਨ ਲਈ ਕੁੰਡਲੀ ਮੰਗੀ। 28 ਦਸੰਬਰ ਨੂੰ ਦੋਸ਼ੀ ਨੇ ਉਸਦੀ ਬੇਟੀ ਨੂੰ ਵੀਡੀਓ ਕਾਲ ਕਰਕੇ ਕਿਹਾ ਕਿ ਉਹ ਮੇਰਠ ਆ ਰਿਹਾ ਹੈ। 29 ਦਸੰਬਰ ਨੂੰ ਰਾਤ 8:30 ਵਜੇ ਫੋਨ ਕਰਕੇ ਉਸ ਨੇ ਦੱਸਿਆ ਕਿ ਉਹ ਮੇਰਠ ਆਇਆ ਗਿਆ ਹੈ। ਜਦੋਂ ਬੇਟੀ ਉਸ ਨੂੰ ਮਿਲਣ ਗਈ ਤਾਂ ਉਸ ਦੇ ਮਾਤਾ-ਪਿਤਾ ਉੱਥੇ ਨਹੀਂ ਸਨ। ਇਸ ਕਾਰਨ ਉਸ ਦੀ ਬੇਟੀ ਉਸ ਨੂੰ ਕੈਫੇ ਵਿਚ ਮਿਲੀ। ਉੱਥੇ ਹੀ ਹਿਮਾਂਸ਼ੂ ਨੇ ਉਸਦੀ ਬੇਟੀ ਦੀ ਫੋਟੋ ਆਪਣੇ ਮਾਤਾ ਪਿਤਾ ਨੂੰ ਦਿਖਾਉਣ ਲਈ ਖਿੱਚੀ। 30 ਦਸੰਬਰ ਨੂੰ ਹਿਮਾਂਸ਼ੂ ਨੇ ਉਸਦੀ ਲੜਕੀ ਨੂੰ ਇਹ ਕਹਿ ਕੇ ਦਿੱਲੀ ਬੁਲਾਇਆ ਕਿ ਉਸ ਦੇ ਮਾਤਾ-ਪਿਤਾ ਆ ਰਹੇ ਹਨ।

ਇਹ ਵੀ ਪੜ੍ਹੋ…ਇਸਨੂੰ ਕਹਿੰਦੇ ਨੇ ਅਮੀਰੀ ! ਪਿਓ ਦੀ ਏਅਰਲਾਈਨ…ਪ੍ਰਾਈਵੇਟ ਜੈੱਟ, ਅਜਿਹੀ ਹੈ ਹਾਰਵਰਡ ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਦੀ ਜ਼ਿੰਦਗੀ

ਘਰ ਆ ਕੇ ਵੀ ਦਿੱਤੀ ਧਮਕੀ
ਪਰਿਵਾਰ ਦੀ ਇਜਾਜ਼ਤ ਨਾਲ ਉਸਦੀ ਬੇਟੀ ਦੋਸ਼ੀ ਦੇ ਮਾਪਿਆਂ ਨੂੰ ਮਿਲਣ ਗਈ ਸੀ। ਜਦੋਂ ਉਹ ਕਨਾਟ ਪਲੇਸ ਦੇ ਇੱਕ ਕੈਫੇ ਵਿੱਚ ਪਹੁੰਚੀ ਤਾਂ ਉੱਥੇ ਸਿਰਫ਼ ਹਿਮਾਂਸ਼ੂ ਹੀ ਸੀ। ਕਾਫੀ ਦੇਰ ਤੱਕ ਇੰਤਜ਼ਾਰ ਕਰਨ ਤੋਂ ਬਾਅਦ ਵੀ ਜਦੋਂ ਉਸ ਦੇ ਮਾਤਾ-ਪਿਤਾ ਨਹੀਂ ਆਏ ਤਾਂ ਉਹ ਉਸ ਨੂੰ ਆਪਣੀ ਕਾਰ ‘ਚ ਯੂਪੀ ਸਦਨ ‘ਚ ਛੱਡਣ ਲਈ ਚਲਾ ਗਿਆ। ਯੂਪੀ ਸਦਨ ਪਹੁੰਚ ਕੇ ਉਸ ਦੀ ਲੜਕੀ ਨੇ ਉਸ ਨਾਲ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ ਤਾਂ ਦੋਸ਼ੀ ਨੇ ਉਸ ਨਾਲ ਦੁਰਵਿਵਹਾਰ ਕਰਨਾ ਸ਼ੁਰੂ ਕਰ ਦਿੱਤਾ।

ਉਸ ਦੀ ਬੇਟੀ ਕਿਸੇ ਤਰ੍ਹਾਂ ਯੂਪੀ ਸਦਨ ਦੇ ਅੰਦਰ ਕਮਰੇ ‘ਚ ਚਲੀ ਗਈ, ਕੁਝ ਦੇਰ ਬਾਅਦ ਜਦੋਂ ਦੋਸ਼ੀ ਉੱਥੋਂ ਚਲਾ ਗਿਆ ਤਾਂ ਉਸ ਦੀ ਬੇਟੀ ਟੈਕਸੀ ਬੁਲਾ ਕੇ ਆਪਣੇ ਘਰ ਆ ਗਈ। ਇਸ ਤੋਂ ਬਾਅਦ 31 ਦਸੰਬਰ ਨੂੰ ਰਾਤ 8.30 ਵਜੇ ਹਿਮਾਂਸ਼ੂ ਉਨ੍ਹਾਂ ਦੇ ਘਰ ਆਇਆ। ਜਦੋਂ ਉਸ ਦੀ ਬੇਟੀ ਨੇ ਉਸ ਨੂੰ ਉਥੋਂ ਚਲੇ ਜਾਣ ਲਈ ਕਿਹਾ ਤਾਂ ਉਹ ਧਮਕੀਆਂ ਦੇਣ ਲੱਗ ਪਿਆ ਕਿ ਉਸ ਦੇ ਸਿਆਸਤਦਾਨਾਂ ਅਤੇ ਅੰਡਰਵਰਲਡ ਨਾਲ ਸਬੰਧ ਹਨ। ਜੇਕਰ ਉਹ ਉਸ ਨਾਲ ਮਹਾਰਾਸ਼ਟਰ ਨਹੀਂ ਜਾਂਦੀ ਤਾਂ ਉਹ ਉਸ ਨੂੰ ਚੁੱਕ ਕੇ ਲੈ ਜਾਵੇਗਾ। ਕਾਫੀ ਹੰਗਾਮਾ ਕਰਨ ਤੋਂ ਬਾਅਦ ਦੋਸ਼ੀ ਉਥੋਂ ਫ਼ਰਾਰ ਹੋ ਗਿਆ। ਪੁਲਿਸ ਨੇ ਜੱਜ ਦੀ ਮਾਂ ਦੀ ਸ਼ਿਕਾਇਤ ‘ਤੇ ਮਾਮਲਾ ਦਰਜ ਕਰ ਲਿਆ ਹੈ। ਐਸਪੀ ਸਿਟੀ ਆਯੂਸ਼ ਵਿਕਰਮ ਸਿੰਘ ਦਾ ਕਹਿਣਾ ਹੈ ਕਿ ਸ਼ਿਕਾਇਤ ਦਰਜ ਕਰ ਲਈ ਗਈ ਹੈ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਮੁਲਜ਼ਮਾਂ ਨੂੰ ਜਲਦੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।