Winter Wears : ਗਰਮ ਕੱਪੜਿਆਂ ਨੂੰ ਧੋਣ ਵੇਲੇ ਵਰਤੋ ਇਹ ਸਾਵਧਾਨੀਆਂ, ਸਾਲਾਂ ਤੱਕ ਰਹਿਣਗੇ ਨਵੇਂ

ਵਿੰਟਰ ਵਿਅਰਜ਼ ਬੇਸ਼ੱਕ ਸਾਲ ਦੇ ਕੁਝ ਮਹੀਨੇ ਇਸਤੇਮਾਲ ਕੀਤੇ ਜਾਂਦੇ ਹਨ ਪਰ ਇਨ੍ਹਾਂ ਨੂੰ ਖ਼ਾਸ ਦੇਖਭਾਲ ਦੀ ਜ਼ਰੂਰਤ ਹੁੰਦੀ ਹੈ ਨਹੀਂ ਤਾਂ ਇਹ ਬਹੁਤ ਜਲਦ ਖ਼ਰਾਬ ਹੋ ਜਾਂਦੇ ਹਨ। ਧੋਣ ਤੋਂ ਲੈ ਕੇ ਸੁਕਾਉਣ, ਇੱਥੋਂ ਤਕ ਕਿ ਸਾਂਭ-ਸੰਭਾਲ ਦੇ ਵੀ ਵੱਖਰੇ ਤੌਰ-ਤਰੀਕੇ ਹੁੰਦੇ ਹਨ । ਸਰਦੀ ਦੇ ਮੌਸਮ ਵਿੱਚ ਗਰਮ ਕੱਪੜੇ ਸਾਡੀ ਜ਼ਰੂਰਤ ਬਣ ਜਾਂਦੇ ਹਨ, ਕਿਉਂਕਿ ਇਹ ਸਾਨੂੰ ਠੰਡ ਤੋਂ ਬਚਾਉਣ ਦੇ ਨਾਲ-ਨਾਲ ਸਾਨੂੰ ਆਰਾਮ ਅਤੇ ਸਟਾਈਲ ਵੀ ਦਿੰਦੇ ਹਨ। ਊਨੀ ਸਵੈਟਰ, ਜੈਕਟ, ਸ਼ਾਲ, ਥਰਮਲ ਅਤੇ ਹੋਰ ਗਰਮ ਕੱਪੜੇ ਨਾ ਸਿਰਫ਼ ਮਹਿੰਗੇ ਹਨ, ਸਗੋਂ ਵਿਸ਼ੇਸ਼ ਦੇਖਭਾਲ ਦੀ ਵੀ ਲੋੜ ਹੈ। ਪਰ ਅਕਸਰ ਲੋਕ ਗਰਮ ਕੱਪੜੇ ਧੋਂਦੇ ਸਮੇਂ ਕੁਝ ਆਮ ਗਲਤੀਆਂ ਕਰ ਦਿੰਦੇ ਹਨ, ਜਿਸ ਕਾਰਨ ਕੱਪੜੇ ਆਪਣੀ ਚਮਕ, ਕੋਮਲਤਾ ਅਤੇ ਲੰਬੀ ਉਮਰ ਗੁਆ ਦਿੰਦੇ ਹਨ। ਜੇਕਰ ਇਹਨਾਂ ਨੂੰ ਸਹੀ ਢੰਗ ਨਾਲ ਨਾ ਧੋਤਾ ਜਾਵੇ, ਤਾਂ ਕੱਪੜੇ ਸੁੰਗੜ ਸਕਦੇ ਹਨ, ਰੰਗ ਫਿੱਕੇ ਪੈ ਸਕਦੇ ਹਨ ਅਤੇ ਉਨ੍ਹਾਂ ਦੀ ਗੁਣਵੱਤਾ ਵੀ ਵਿਗੜ ਸਕਦੀ ਹੈ। ਭਾਵੇਂ ਤੁਸੀਂ ਨਵਾਂ ਉੱਨ ਦਾ ਸਵੈਟਰ ਖਰੀਦਿਆ ਹੈ ਜਾਂ ਕੋਈ ਪੁਰਾਣਾ ਸ਼ਾਲ ਹਰ ਗਰਮ ਕੱਪੜੇ ਨੂੰ ਧੋਣ ਵੇਲੇ ਸਾਵਧਾਨੀ ਜ਼ਰੂਰੀ ਹੈ। ਅੱਜ ਇਸ ਆਰਟੀਕਲ ‘ਚ ਅਸੀਂ ਤੁਹਾਨੂੰ ਗਰਮ ਕੱਪੜੇ ਧੋਣ ਦੌਰਾਨ ਹੋਣ ਵਾਲੀਆਂ ਆਮ ਗਲਤੀਆਂ ਬਾਰੇ ਦੱਸਣ ਜਾ ਰਹੇ ਹਾਂ। ਅਸੀਂ ਤੁਹਾਨੂੰ ਇਸ ਤੋਂ ਬਚਣ ਦਾ ਤਰੀਕਾ ਵੀ ਦੱਸਾਂਗੇ।

ਗਰਮ ਕੱਪੜੇ ਧੋਣ ਵੇਲੇ ਕੀਤੀਆਂ ਜਾਣ ਵਾਲੀਆਂ ਆਮ ਗਲਤੀਆਂ –

ਧੋਣ ਦਾ ਸਹੀ ਤਰੀਕਾ ਨਾ ਸਮਝਣਾ

ਲੋਕ ਅਕਸਰ ਗਰਮ ਕੱਪੜਿਆਂ ‘ਤੇ ਲੱਗੇ ਲੇਬਲ ਨੂੰ ਨਜ਼ਰਅੰਦਾਜ਼ ਕਰ ਦਿੰਦੇ ਹਨ। ਪਰ ਕੱਪੜਿਆਂ ‘ਤੇ ਦਿੱਤੇ ਗਏ ਧੋਣ ਦੇ ਲੇਬਲ ਨੂੰ ਧਿਆਨ ਨਾਲ ਪੜ੍ਹਨਾ ਚਾਹੀਦਾ ਹੈ ਅਤੇ ਇਸ ਵਿਚ ਲਿਖੀਆਂ ਹਦਾਇਤਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ। ਨਾਲ ਹੀ ਜੇਕਰ ਉਨ੍ਹਾਂ ‘ਤੇ ਡਰਾਈਕਲੀਨ ਓਨਲੀ ਲਿਖਿਆ ਹੋਇਆ ਹੈ ਤਾਂ ਉਨ੍ਹਾਂ ਘਰ ‘ਚ ਵਾਸ਼ ਕਰਨ ਤੋਂ ਬਚੋ।

ਗਰਮ ਪਾਣੀ ਦੀ ਵਰਤੋਂ

ਸਰਦੀ ਦੇ ਮੌਸਮ ਵਿਚ ਅਕਸਰ ਲੋਕ ਠੰਡ ਦੇ ਕਾਰਨ ਗਰਮ ਪਾਣੀ ਨਾਲ ਕੱਪੜੇ ਧੋ ਲੈਂਦੇ ਹਨ। ਪਰ ਅਜਿਹਾ ਨਹੀਂ ਕੀਤਾ ਜਾਣਾ ਚਾਹੀਦਾ। ਗਰਮ ਪਾਣੀ ਦੀ ਵਰਤੋਂ ਕਰਨ ਨਾਲ ਉੱਨ ਅਤੇ ਰੇਸ਼ੇ ਵਾਲੇ ਕੱਪੜੇ ਸੁੰਗੜ ਸਕਦੇ ਹਨ। ਹੋ ਸਕੇ ਤਾਂ ਗਰਮ ਕੱਪੜੇ ਠੰਡੇ ਪਾਣੀ ਨਾਲ ਧੋਵੋ। ਇਸ ਲਈ ਤੁਸੀਂ ਕੋਸੇ ਪਾਣੀ ਦੀ ਵੀ ਵਰਤੋਂ ਕਰ ਸਕਦੇ ਹੋ।

ਮਜ਼ਬੂਤ ​​ਡਿਟਰਜੈਂਟ ਦੀ ਵਰਤੋਂ

ਬਹੁਤ ਸਾਰੇ ਲੋਕ ਗਰਮ ਕੱਪੜੇ ਧੋਣ ਲਈ ਬਾਜ਼ਾਰ ਵਿਚ ਮਿਲਣ ਵਾਲੇ ਆਮ ਡਿਟਰਜੈਂਟ ਦੀ ਵਰਤੋਂ ਕਰਦੇ ਹਨ। ਪਰ ਇਹ ਡਿਟਰਜੈਂਟ ਕੈਮੀਕਲਾਂ ਨਾਲ ਭਰੇ ਹੋਏ ਹੁੰਦੇ ਹਨ ਜਿਸ ਕਾਰਨ ਕੱਪੜੇ ਖਰਾਬ ਹੋ ਸਕਦੇ ਹਨ। ਇਸ ਲਈ, ਤੁਹਾਨੂੰ ਊਨੀ ਕੱਪੜਿਆਂ ਲਈ ਹਲਕੇ ਜਾਂ ਤਰਲ ਡਿਟਰਜੈਂਟ ਦੀ ਵਰਤੋਂ ਕਰਨੀ ਚਾਹੀਦੀ ਹੈ। ਜੋ ਕਿ ਖਾਸ ਕਰਕੇ ਗਰਮ ਕੱਪੜਿਆਂ ਲਈ ਹੀ ਹਨ।

ਰਗੜ ਕੇ ਧੋਣਾ

ਆਮ ਤੌਰ ‘ਤੇ ਲੋਕ ਧੱਬੇ ਹਟਾਉਣ ਲਈ ਕੱਪੜੇ ਨੂੰ ਰਗੜਦੇ ਹਨ। ਕੁਝ ਲੋਕ ਇਸ ਨੂੰ ਊਨੀ ਕੱਪੜਿਆਂ ਨਾਲ ਵੀ ਕਰਦੇ ਹਨ। ਪਰ ਊਨੀ ਕੱਪੜਿਆਂ ਨੂੰ ਜ਼ੋਰਦਾਰ ਰਗੜਨ ਨਾਲ ਉਨ੍ਹਾਂ ਦੀ ਸਤ੍ਹਾ ਨੂੰ ਨੁਕਸਾਨ ਹੋ ਸਕਦਾ ਹੈ। ਇਸ ਲਈ, ਗਰਮ ਕੱਪੜੇ ਹਮੇਸ਼ਾ ਹੌਲੀ-ਹੌਲੀ ਅਤੇ ਹੱਥੀਂ ਧੋਵੋ।

ਇਹ ਵੀ ਪੜ੍ਹੋ…ਜੇਕਰ ਤੁਸੀਂ ਵੀ ਸਰਦੀ ‘ਚ ਵਾਲਾਂ ਦੇ ਰੁੱਖੇ ਅਤੇ ਫ੍ਰਿਜੀ ਹੋਣ ਤੋਂ ਪਰੇਸ਼ਾਨ ਹੋ, ਤਾਂ ਅਪਣਾਓ ਇਹ ਟਿਪਸ…

ਬਹੁਤ ਜ਼ਿਆਦਾ ਧੋਣਾ

ਅਕਸਰ ਲੋਕ ਗਰਮ ਕੱਪੜੇ ਵੀ ਕਈ ਵਾਰ ਧੋਂਦੇ ਹਨ। ਪਰ ਵਾਰ-ਵਾਰ ਧੋਣ ਨਾਲ ਗਰਮ ਕੱਪੜਿਆਂ ਦੀ ਗੁਣਵੱਤਾ ਜਲਦੀ ਖਰਾਬ ਹੋ ਸਕਦੀ ਹੈ। ਇਸ ਲਈ, ਜਦੋਂ ਤੱਕ ਜ਼ਰੂਰੀ ਨਾ ਹੋਵੇ, ਗਰਮ ਅਤੇ ਊਨੀ ਕੱਪੜੇ ਵਾਰ-ਵਾਰ ਧੋਣ ਤੋਂ ਬਚੋ। ਵੂਲਨ ਕੱਪੜਿਆਂ ਦੀ ਰੰਗਤ ਬਰਕਰਾਰ ਰੱਖਣ ਲਈ ਇਨ੍ਹਾਂ ਨੂੰ ਧੁੱਪੇ ਸੁਕਾਉਣਾ ਛੱਡ ਦਿਉ। ਮਹਿੰਗੇ ਵੂਲਨਜ਼ ਨੂੰ ਕਿਸੇ ਟਾਵਲ ਉੱਪਰ ਫੈਲਾ ਕੇ ਸੁਕਾਓ।

ਸਹੀ ਢੰਗ ਨਾਲ ਸਟੋਰ ਨਾ ਕਰਨਾ

ਧੋਣ ਤੋਂ ਬਾਅਦ ਗਰਮ ਕੱਪੜਿਆਂ ਨੂੰ ਸਹੀ ਢੰਗ ਨਾਲ ਸਟੋਰ ਨਾ ਕਰਨਾ ਵੀ ਉਨ੍ਹਾਂ ਦੀ ਬਣਤਰ ਨੂੰ ਖਰਾਬ ਕਰ ਸਕਦਾ ਹੈ। ਇਸ ਲਈ ਸਾਫ਼ ਅਤੇ ਸੁੱਕੇ ਕੱਪੜਿਆਂ ਨੂੰ ਮੋੜ ਕੇ ਸੁੱਕੀ ਥਾਂ ‘ਤੇ ਰੱਖੋ।ਕਈ ਵਾਰ ਵਿੰਟਰ ਵਿਅਰਜ਼ ਨੂੰ ਰਾਤ ਭਰ ਬਾਹਰ ਛੱਡ ਦੇਣ ਨਾਲ ਉਹ ਹਲਕੇ ਭਿੱਜ ਜਾਂਦੇ ਹਨ, ਫਿਰ ਵੀ ਅਸੀਂ ਉਨ੍ਹਾਂ ਨੂੰ ਤੈਅ ਕਰ ਕੇ ਰੱਖ ਦਿੰਦੇ ਹਾਂ ਜੋ ਗ਼ਲਤ ਹੈ। ਚੰਗੀ ਤਰ੍ਹਾਂ ਸੁਕਾਉਣ ਤੋਂ ਬਾਅਦ ਹੀ ਵਾਰਡਰੋਬ ‘ਚ ਰੱਖੋ।

ਇਨ੍ਹਾਂ ਛੋਟੀਆਂ-ਛੋਟੀਆਂ ਗੱਲਾਂ ਦਾ ਧਿਆਨ ਰੱਖ ਕੇ ਤੁਸੀਂ ਆਪਣੇ ਗਰਮ ਕੱਪੜਿਆਂ ਨੂੰ ਲੰਬੇ ਸਮੇਂ ਤੱਕ ਨਵਾਂ ਰੱਖ ਸਕਦੇ ਹੋ ਅਤੇ ਆਪਣੇ ਮਹਿੰਗੇ ਤੇ ਫੇਵਰਿਟ ਵੂਲਨਜ਼ ਨੂੰ ਸਾਲੋ ਸਾਲ ਪਹਿਨ ਸਕਦੇ ਹੋ।