ਸਿਰਫ Taj Mahal ਹੀ ਨਹੀਂ, ਇਹ ਇਮਾਰਤਾਂ ਵੀ ਮੰਨੀਆਂ ਜਾਂਦੀਆਂ ਹਨ ਮੁਹੱਬਤ ਦੀ ਨਿਸ਼ਾਨੀ

ਪ੍ਰੇਮੀਆਂ ਲਈ ਅੱਜ ਦਾ ਦਿਨ ਬਹੁਤ ਖਾਸ ਹੈ ਜਿਸ ਨੂੰ ਵੈਲੇਨਟਾਈਨ ਡੇਅ ਵਜੋਂ ਮਨਾਇਆ ਜਾਂਦਾ ਹੈ। ਪ੍ਰੇਮੀ ਜੋੜੇ ਵੈਲੇਨਟਾਈਨ ਵੀਕ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰਦੇ ਹਨ। ਇਹ ਉਹ ਸਮਾਂ ਹੁੰਦਾ ਹੈ ਜਦੋਂ ਤੁਹਾਨੂੰ ਆਪਣੇ ਪਿਆਰ ਦਾ ਇਜ਼ਹਾਰ ਕਰਨ ਦਾ ਮੌਕਾ ਮਿਲਦਾ ਹੈ। ਜੋੜੇ ਇਸ ਦਿਨ ਨੂੰ ਬਹੁਤ ਹੀ ਖਾਸ ਤਰੀਕੇ ਨਾਲ ਮਨਾਉਂਦੇ ਹਨ। ਕੁਝ ਅਨੋਖੀ ਪ੍ਰੇਮ ਕਹਾਣੀਆਂ ਸਦੀਆਂ ਤੋਂ ਚਲੀਆਂ ਆ ਰਹੀਆਂ ਹਨ, ਜਿਨ੍ਹਾਂ ਨੂੰ ਸੁਣਦਿਆਂ ਹੀ ਅਸੀਂ ਵੱਡੇ ਹੋਏ ਹਾਂ। ਤੁਹਾਨੂੰ ਪਤਾ ਹੋਵੇਗਾ ਕਿ ਤਾਜ ਮਹਿਲ ਨੂੰ ਪਿਆਰ ਦਾ ਪ੍ਰਤੀਕ ਵੀ ਮੰਨਿਆ ਜਾਂਦਾ ਹੈ ਜੋ ਸ਼ਾਹਜਹਾਂ ਨੇ ਆਪਣੀ ਪਤਨੀ ਮੁਮਤਾਜ਼ ਲਈ ਬਣਵਾਇਆ ਸੀ। ਪਰ ਅਜਿਹਾ ਨਹੀਂ ਹੈ ਕਿ ਸਿਰਫ ਤਾਜ ਮਹਿਲ ਨੂੰ ਹੀ ਪਿਆਰ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਅੱਜ ਵੈਲੇਨਟਾਈਨ ਡੇਅ ਦੇ ਮੌਕੇ ‘ਤੇ ਅਸੀਂ ਤੁਹਾਨੂੰ ਕੁਝ ਅਜਿਹੇ ਹੀ ਇਤਿਹਾਸਕ ਮਹਿਲ, ਮਕਬਰੇ ਅਤੇ ਮੰਦਰਾਂ ਬਾਰੇ ਦੱਸਣ ਜਾ ਰਹੇ ਹਾਂ ਜੋ ਪਿਆਰ ਦੀਆਂ ਨਿਸ਼ਾਨੀਆਂ ਵਜੋਂ ਪ੍ਰਸਿੱਧ ਹਨ।

1. ਚਿਤੌੜਗੜ੍ਹ ਕਿਲਾ
ਸਭ ਤੋਂ ਪਹਿਲਾਂ ਚਿਤੌੜਗੜ੍ਹ ਕਿਲੇ ਦੀ ਗੱਲ ਕਰੀਏ ਜੋ 7ਵੀਂ ਸਦੀ ਵਿੱਚ ਬਣਿਆ ਸੀ। ਇਹ ਰਾਜਾ ਰਤਨ ਰਾਵਲ ਸਿੰਘ ਨੇ ਆਪਣੀ ਰਾਣੀ ਪਦਮਿਨੀ ਲਈ ਬਣਾਇਆ ਸੀ, ਅਤੇ ਇਹ ਉਸਦੇ ਪਿਆਰ ਦੀ ਨਿਸ਼ਾਨੀ ਮੰਨਿਆ ਜਾਂਦਾ ਹੈ। ਇਹ ਸਮਾਰਕ ਕਮਲ ਕੁੰਡ ਦੇ ਕਿਨਾਰੇ ਹੈ ਜੋ ਬਹੁਤ ਸੁੰਦਰ ਹੈ। ਤੁਸੀਂ ਇੱਕ ਵਾਰ ਇੱਥੇ ਜਾ ਸਕਦੇ ਹੋ ਅਤੇ ਇਸਨੂੰ ਦੇਖ ਕੇ ਤੁਹਾਡਾ ਪਿਆਰ ਵਿੱਚ ਵਿਸ਼ਵਾਸ ਹੋਰ ਵੀ ਵੱਧ ਜਾਵੇਗਾ।

2. ਮਸਤਾਨੀ ਮਹਿਲ
ਅਗਲਾ ਨਾਮ ਮਹਾਰਾਸ਼ਟਰ ਦੇ ਪੁਣੇ ਸ਼ਹਿਰ ਵਿੱਚ ਬਣਿਆ ਮਸਤਾਨੀ ਮਹਿਲ ਹੈ ਜੋ ਬਾਜੀਰਾਓ ਨੇ ਆਪਣੀ ਦੂਜੀ ਪਤਨੀ ਮਸਤਾਨੀ ਲਈ ਬਣਵਾਇਆ ਸੀ। ਜੇਕਰ ਤੁਸੀਂ ਰਣਵੀਰ ਸਿੰਘ ਅਤੇ ਦੀਪਿਕਾ ਪਾਦੁਕੋਣ ਦੀ ਫਿਲਮ ਬਾਜੀਰਾਓ-ਮਸਤਾਨੀ ਦੇਖੀ ਹੈ, ਤਾਂ ਤੁਹਾਨੂੰ ਪਤਾ ਹੋਵੇਗਾ ਕਿਉਂਕਿ ਪੂਰੀ ਫਿਲਮ ਇਸ ਕਹਾਣੀ ‘ਤੇ ਆਧਾਰਿਤ ਹੈ। ਇਸ ਮਸਤਾਨੀ ਮਹਿਲ ਨੂੰ ਸ਼ਨੀਵਾਰ ਵਾੜਾ ਵੀ ਕਿਹਾ ਜਾਂਦਾ ਹੈ।

3. ਰੂਪਮਤੀ ਪਵੇਲੀਅਨ, ਮੱਧ ਪ੍ਰਦੇਸ਼
ਮੱਧ ਪ੍ਰਦੇਸ਼ ਦੇ ਮਾਂਡੂ ਸ਼ਹਿਰ ‘ਚ ਰੂਪਮਤੀ ਪੈਵੇਲੀਅਨ ਹੈ, ਜਿਸ ਨੂੰ ਆਖਰੀ ਆਜ਼ਾਦ ਸ਼ਾਸਕ ਸੁਲਤਾਨ ਬਾਜ਼ ਬਹਾਦਰ ਨੇ ਆਪਣੀ ਪਤਨੀ ਰੂਪਮਤੀ ਲਈ ਬਣਵਾਇਆ ਸੀ। ਇਹ ਬਹੁਤ ਹੀ ਸੁੰਦਰ ਹੈ ਜੋ ਕਿ 366 ਮੀਟਰ ਦੀ ਉਚਾਈ ‘ਤੇ ਸਥਿਤ ਹੈ । ਉਥੋਂ ਨਰਮਦਾ ਨਦੀ ਵੀ ਦਿਖਾਈ ਦਿੰਦੀ ਹੈ, ਜੇਕਰ ਤੁਸੀਂ ਇਤਿਹਾਸਕ ਸਥਾਨਾਂ ‘ਤੇ ਜਾਣਾ ਚਾਹੁੰਦੇ ਹੋ ਤਾਂ ਇਹ ਸਭ ਤੋਂ ਵਧੀਆ ਹੈ।

4. ਗੁਜਰੀ ਮਹਿਲ
ਪਿਆਰ ਕਰਨ ਵਾਲੇ ਬਹੁਤ ਹਨ, ਪਰ ਇਸ ਨੂੰ ਪੂਰਾ ਕਰਨ ਵਾਲੇ ਬਹੁਤ ਘੱਟ ਹਨ। ਪਹਿਲੇ ਸਮਿਆਂ ਵਿੱਚ ਮਹਿਲ ਸਿਰਫ਼ ਪਿਆਰ ਦੀ ਖ਼ਾਤਰ ਹੀ ਬਣਾਏ ਜਾਂਦੇ ਸਨ। ਅਸੀਂ ਅਜਿਹੇ ਹੀ ਇਕ ਮਹਿਲ ਬਾਰੇ ਦੱਸਣ ਜਾ ਰਹੇ ਹਾਂ ਜਿਸ ਦਾ ਨਾਂ ਹੈ ਗੁਜਰੀ ਮਹਿਲ। ਰਾਜਾ ਮਾਨ ਸਿੰਘ ਤੋਮਰ ਨੇ ਇਹ ਮਹਿਲ ਆਪਣੀ ਪ੍ਰੇਮਿਕਾ ਬਣੀ ਰਾਣੀ ਮ੍ਰਿਗਨਯਨੀ ਲਈ ਬਣਾਇਆ ਸੀ ਜੋ ਗਵਾਲੀਅਰ ਵਿੱਚ ਹੈ। ਇਹ ਬਹੁਤ ਸੁੰਦਰ ਹੈ, ਜਿਸ ਨੂੰ ਦੇਖਣਾ ਤਾਂ ਬਣਦਾ ਹੀ ਹੈ।

5. ਸਾਂਕਾ ਸ਼ਿਆਮ ਜੀ ਮੰਦਿਰ
ਹੁਣ ਤੱਕ ਤੁਸੀਂ ਉਨ੍ਹਾਂ ਰਾਜਿਆਂ ਬਾਰੇ ਪੜ੍ਹਿਆ ਹੋਵੇਗਾ ਜਿਨ੍ਹਾਂ ਨੇ ਆਪਣੀਆਂ ਰਾਣੀਆਂ ਲਈ ਮਹਿਲ ਅਤੇ ਕਬਰਾਂ ਬਣਵਾਈਆਂ ਸਨ। ਹੁਣ ਜਾਣੋ ਉਸ ਰਾਣੀ ਬਾਰੇ ਜਿਸ ਨੇ ਆਪਣੇ ਪਤੀ ਦੀ ਮੌਤ ਤੋਂ ਬਾਅਦ ਉਸ ਦੀ ਯਾਦ ‘ਚ ਮੰਦਰ ਬਣਵਾਇਆ ਸੀ। ਅਸੀਂ ਗੱਲ ਕਰ ਰਹੇ ਹਾਂ ਮਹਾਰਾਣੀ ਭਾਗਿਆਵਤੀ ਦੀ, ਜਿਸ ਨੇ ਆਪਣੇ ਪਤੀ ਰਾਜਾ ਸ਼ਿਆਮ ਸਿੰਘ ਦੀ ਮੌਤ ਤੋਂ ਬਾਅਦ ਇੱਕ ਸ਼ਾਨਦਾਰ ਮੰਦਿਰ ਬਣਵਾਇਆ ਜਿਸ ਦਾ ਨਾਮ ਸਾਂਕਾ ਸ਼ਿਆਮ ਜੀ ਮੰਦਿਰ ਰੱਖਿਆ ਗਿਆ।