12 ਮਹੀਨੇ, 12 ਜਹਾਜ਼ ਕਰੈਸ਼, 434 ਮੌਤਾਂ… ਸਾਲ 2024 ‘ਚ ਹੋਏ ਦਿਲ ਕੰਬਾਊ ਜਹਾਜ਼ ਹਾਦਸੇ

ਸਾਲ 2024 ‘ਚ ਪੂਰੀ ਦੁਨੀਆ ‘ਚ 12 ਵੱਡੇ ਜਹਾਜ਼ ਹਾਦਸੇ ਹੋਏ, ਜਿਨ੍ਹਾਂ ‘ਚ 400 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋ ਗਈ। ਸਾਲ ਦੀ ਸ਼ੁਰੂਆਤ ਇੱਕ ਜਹਾਜ਼ ਹਾਦਸੇ ਨਾਲ ਹੋਈ ਅਤੇ ਇੱਕ ਜਹਾਜ਼ ਹਾਦਸੇ ਨਾਲ ਹੀ ਖਤਮ ਵੀ ਹੋਈ।

ਸਾਲ ਦੇ ਆਖਰੀ ਮਹੀਨੇ ਨੇ ਪੂਰੀ ਦੁਨੀਆ ਨੂੰ ਇੱਕ ਨਾ ਭੁੱਲਣ ਵਾਲਾ ਦੁੱਖ ਦਿੱਤਾ ਹੈ। 2 ਦਿਨ ਪਹਿਲਾਂ ਪੂਰੀ ਦੁਨੀਆਂ ਨੇ ਇੱਕ ਅਜਿਹਾ ਜਹਾਜ਼ ਹਾਦਸਾ ਦੇਖਿਆ ਜਿਸ ਵਿੱਚ 179 ਲੋਕ ਜ਼ਿੰਦਾ ਸੜ ਗਏ ਸਨ। ਦੱਖਣੀ ਕੋਰੀਆ ਦਾ ਇਹ ਹਾਦਸਾ 1997 ਤੋਂ ਬਾਅਦ ਦੇਸ਼ ਦਾ ਸਭ ਤੋਂ ਭਿਆਨਕ ਜਹਾਜ਼ ਹਾਦਸਾ ਸੀ। ਇਸ ਤੋਂ ਪਹਿਲਾਂ 25 ਦਸੰਬਰ ਨੂੰ ਕਜ਼ਾਖ਼ਸਤਾਨ ਦੇ ਅਕਤਾਉ ਸ਼ਹਿਰ ਦੇ ਨੇੜੇ ਅਜ਼ਰਬਾਈਜਾਨ ਏਅਰਲਾਈਨ ਦਾ ਇੱਕ ਜਹਾਜ਼ ਕਰੈਸ਼ ਹੋ ਗਿਆ ਸੀ। ਇਸ ਹਾਦਸੇ ਵਿੱਚ 38 ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਤੋਂ ਬਾਅਦ ਹੁਣ ਇਸ ਦੀਆਂ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀਆਂ ਹਨ।

2024 ਦੇ 12 ਮਹੀਨਿਆਂ ਵਿੱਚ, ਦੁਨੀਆ ਭਰ ਵਿੱਚ 12 ਜਹਾਜ਼ ਹਾਦਸੇ ਹੋਏ। ਇਨ੍ਹਾਂ ਹਾਦਸਿਆਂ ਵਿੱਚ 434 ਲੋਕਾਂ ਦੀ ਜਾਨ ਚਲੀ ਗਈ। ਈਰਾਨ ਦੇ ਰਾਸ਼ਟਰਪਤੀ ਇਬਰਾਹਿਮ ਰਾਇਸੀ ਦੀ ਇੱਕ ਹਾਦਸੇ ਵਿੱਚ ਮੌਤ ਹੋ ਗਈ। ਮਲਾਵੀ ਦੇ ਉਪ ਰਾਸ਼ਟਰਪਤੀ ਦੀ ਦੁਰਘਟਨਾ ਵਿੱਚ ਮੌਤ ਹੋ ਗਈ ਸੀ।

ਆਓ ਇੱਕ ਨਜ਼ਰ ਮਾਰੀਏ ਸਾਲ 2024 ਵਿੱਚ ਹੋਏ ਜਹਾਜ਼ ਹਾਦਸਿਆਂ ‘ਤੇ…
ਜਪਾਨ ਵਿੱਚ 2 ਜਨਵਰੀ, 2024 ਨੂੰ ਟੋਕੀਓ ਦੇ ਹਨੇਡਾ ਹਵਾਈ ਅੱਡੇ ‘ਤੇ ਇੱਕ ਜਹਾਜ਼ ਹਾਦਸਾ ਵਾਪਰਿਆ ਸੀ। ਜਾਪਾਨ ਏਅਰਲਾਈਨਜ਼ (ਜੇਏਐਲ) ਦਾ ਜਹਾਜ਼ ਇੱਕ ਛੋਟੇ ਜਹਾਜ਼ ਨਾਲ ਟਕਰਾ ਗਿਆ। ਟਕਰਾਉਂਦੇ ਹੀ ਜਹਾਜ਼ ਨੂੰ ਅੱਗ ਲੱਗ ਗਈ ਪਰ ਜਹਾਜ਼ ਵਿਚ ਸਵਾਰ ਸਾਰੇ 379 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ। ਇਸੇ ਹਾਦਸੇ ‘ਚ ਛੋਟੇ ਜਹਾਜ਼ ‘ਚ ਸਵਾਰ 6 ‘ਚੋਂ 5 ਲੋਕਾਂ ਦੀ ਮੌਤ ਹੋ ਗਈ।

ਕੈਨੇਡਾ ਵਿੱਚ 23 ਜਨਵਰੀ ਨੂੰ ਹੋਏ ਜਹਾਜ਼ ਹਾਦਸੇ ਵਿੱਚ ਛੇ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਹ ਹਾਦਸਾ ਕੈਨੇਡਾ ਦੇ ਫੋਰਟ ਸਮਿਥ ਨੇੜੇ ਵਾਪਰਿਆ। ਕੈਨੇਡਾ ਵਿੱਚ ਹੀ 29 ਦਸੰਬਰ ਨੂੰ ਏਅਰ ਕੈਨੇਡਾ ਦੀ ਇੱਕ ਉਡਾਣ ਅੱਗ ਦਾ ਸ਼ਿਕਾਰ ਹੋ ਗਈ ਸੀ। ਨੋਵਾ ਸਕੋਸ਼ੀਆ ਸੂਬੇ ਦੇ ਹੈਲੀਫੈਕਸ ਹਵਾਈ ਅੱਡੇ ‘ਤੇ ਉਤਰਨ ਸਮੇਂ ਜਹਾਜ਼ ਦੇ ਗੀਅਰ ਕੰਮ ਨਹੀਂ ਕਰਦੇ ਸਨ, ਜਿਸ ਕਾਰਨ ਜਹਾਜ਼ ਨੂੰ ਅੱਗ ਲੱਗ ਗਈ ਸੀ। ਹਾਦਸੇ ਵਿੱਚ ਜਹਾਜ਼ ਵਿੱਚ ਸਵਾਰ 73 ਲੋਕਾਂ ਨੂੰ ਬਚਾ ਲਿਆ ਗਿਆ।

ਇਹ ਵੀ ਪੜ੍ਹੋ…ਅਮਰੀਕੀ ਨਹੀਂ…ਭਾਰਤੀ ਹਨ Bose Speakers…ਜਾਣੋ ਸੰਸਥਾਪਕ ਨੇ ਆਪਣੇ ਕਾਲਜ ਨੂੰ ਕਿਉਂ ਦਾਨ ਕੀਤੀ ਕੰਪਨੀ ?

24 ਜਨਵਰੀ ਨੂੰ ਰੂਸ ‘ਚ ਜਹਾਜ਼ ਹਾਦਸਾ ਹੋਇਆ ਸੀ। ਰੂਸ ਦਾ ਇੱਕ ਫੌਜੀ ਜਹਾਜ਼ ਬੇਲਗੋਰੋਡ ਵਿੱਚ ਹਾਦਸਾਗ੍ਰਸਤ ਹੋ ਗਿਆ, ਜਿਸ ਵਿੱਚ 74 ਲੋਕਾਂ ਦੀ ਮੌਤ ਹੋ ਗਈ। ਜਹਾਜ਼ ਵਿੱਚ 65 ਯੂਕਰੇਨੀ ਕੈਦੀ ਅਤੇ 9 ਰੂਸੀ ਅਮਲੇ ਦੇ ਮੈਂਬਰ ਸਵਾਰ ਸਨ। ਇਸ ਹਾਦਸੇ ਨੂੰ ਲੈ ਕੇ ਰੂਸ ਦੇ ਬਚਾਅ ਮੰਤਰਾਲੇ ਨੇ ਯੂਕਰੇਨ ‘ਤੇ ਦੋਸ਼ ਲਾਇਆ ਸੀ ਕਿ ਜਹਾਜ਼ ਨੂੰ ਨਿਸ਼ਾਨਾ ਬਣਾ ਕੇ ਮਾਰਿਆ ਗਿਆ ਸੀ, ਜਦਕਿ ਯੂਕਰੇਨ ਨੇ ਇਸ ਨੂੰ ਰੂਸ ਦੀ ਸਾਜ਼ਿਸ਼ ਕਰਾਰ ਦਿੱਤਾ ਸੀ।

12 ਮਾਰਚ ਨੂੰ ਵੀ ਰੂਸ ‘ਚ ਜਹਾਜ਼ ਹਾਦਸਾ ਹੋਇਆ ਸੀ। ਇਵਾਨੋਵੋ ਓਬਲਾਸਟ ਵਿੱਚ ਇੱਕ ਇਲੁਸ਼ਿਨ ਆਈਐਲ-76 ਕਾਰਗੋ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ। ਇਸ ਹਾਦਸੇ ‘ਚ 7 ਯਾਤਰੀਆਂ ਅਤੇ ਚਾਲਕ ਦਲ ਦੇ 8 ਮੈਂਬਰਾਂ ਸਮੇਤ 15 ਲੋਕਾਂ ਦੀ ਮੌਤ ਹੋ ਗਈ। ਜਹਾਜ਼ ਦੇ ਇੱਕ ਇੰਜਣ ਵਿੱਚ ਅੱਗ ਲੱਗਣ ਕਾਰਨ ਇਹ ਹਾਦਸਾ ਵਾਪਰਿਆ।