CU ਤੋਂ ਪੜ੍ਹਾਈ, ਰੇਡੀਓ ਮਿਰਚੀ ‘ਚ ਨੌਕਰੀ ਅਤੇ 7 ਲੱਖ ਫਾਲੋਅਰਜ਼… ਨਾਮ ਤੇ ਸ਼ੋਹਰਤ ਸਭ ਕੁਝ ਸੀ, ਫਿਰ ‘ਜੰਮੂ ਕੀ ਧੜਕਨ’ RJ ਸਿਮਰਨ ਨੇ ਕਿਉਂ ਕੀਤੀ ਖੁਦਕੁਸ਼ੀ ?
ਪੁਲਿਸ ਜੰਮੂ ਦੀ ਰਹਿਣ ਵਾਲੀ ਮਸ਼ਹੂਰ ਰੇਡੀਓ ਜੌਕੀ ਆਰਜੇ ਸਿਮਰਨ ਸਿੰਘ ਦੀ ਖੁਦਕੁਸ਼ੀ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਹੋਇਆ ਹੈ ਕਿ 25 ਸਾਲਾ ਰੇਡੀਓ ਜੌਕੀ ਨੇ ਅਜਿਹਾ ਭਿਆਨਕ ਕਦਮ ਕਿਉਂ ਚੁੱਕਿਆ? ਕੀ ਉਹ ਕਿਸੇ ਤਣਾਅ ਵਿੱਚੋਂ ਲੰਘ ਰਹੀ ਸੀ ਜਾਂ ਮਾਮਲਾ ਕੁਝ ਹੋਰ ਹੈ? ਅਜਿਹੇ ਕਈ ਸਵਾਲਾਂ ਦੇ ਜਵਾਬ ਜਾਣਨ ਲਈ ਪੁਲਸ ਸਿਮਰਨ ਦੇ ਪਰਿਵਾਰਕ ਮੈਂਬਰਾਂ ਅਤੇ ਉਸ ਦੇ ਸਾਰੇ ਕਰੀਬੀ ਦੋਸਤਾਂ ਤੋਂ ਪੁੱਛਗਿੱਛ ਕਰ ਰਹੀ ਹੈ।
ਸਿਮਰਨ ਕੋਠੀ ਨੰਬਰ 59, ਸੈਕਟਰ 47, ਗੁਰੂਗ੍ਰਾਮ ਵਿੱਚ ਰਹਿੰਦੀ ਸੀ। ਵੀਰਵਾਰ ਨੂੰ ਉਸ ਦੀ ਲਾਸ਼ ਇੱਥੇ ਮਿਲੀ। ਸਿਮਰਨ ਦੇ ਨਾਲ ਰਹਿਣ ਵਾਲੇ ਦੋਸਤ ਨੇ ਇਸ ਦੀ ਸੂਚਨਾ ਪੁਲਸ ਨੂੰ ਦਿੱਤੀ ਸੀ। ਸਿਮਰਨ ਨੇ ਕੇਂਦਰੀ ਯੂਨੀਵਰਸਿਟੀ ਜੰਮੂ ਤੋਂ ਪੜ੍ਹਾਈ ਕੀਤੀ ਸੀ। ਉਹ ਕਾਫ਼ੀ ਹੋਣਹਾਰ ਸੀ। ਉਥੇ ਹੀ ਉਸਦੀ ਪਲੇਸਮੈਂਟ ਰੇਡੀਓ ਮਿਰਚੀ ‘ਚ ਆਰ.ਜੇ. ਦੇ ਤੌਰ ਤੇ ਹੋਈ। ਸਿਮਰਨ ਛੋਟੀ ਉਮਰ ਵਿਚ ਹੀ ਕਾਫੀ ਮਸ਼ਹੂਰ ਹੋ ਗਈ ਸੀ। ਉਸ ਦੀ ਆਵਾਜ਼ ਦਾ ਜਾਦੂ ਅਜਿਹਾ ਸੀ ਕਿ ਲੋਕ ਉਸ ਨੂੰ ਜੰਮੂ ਦੀ ਧੜਕਣ ਕਹਿੰਦੇ ਸਨ। ਉਹ ਇੱਕ ਸੋਸ਼ਲ ਮੀਡੀਆ ਇਨਫਲੂਏਂਸਰ ਸੀ। ਇੰਸਟਾਗ੍ਰਾਮ ‘ਤੇ ਉਸ ਦੇ 7 ਲੱਖ ਫਾਲੋਅਰਜ਼ (rjsimransingh) ਹਨ। ਸਿਮਰਨ ਨੇ ਆਪਣੀ ਆਖਰੀ ਪੋਸਟ 13 ਦਸੰਬਰ ਨੂੰ ਇੰਸਟਾਗ੍ਰਾਮ ‘ਤੇ ਪੋਸਟ ਕੀਤੀ ਸੀ। ਇਸ ਪੋਸਟ ਨੂੰ ਸ਼ੇਅਰ ਕਰਦੇ ਹੋਏ ਸਿਮਰਨ ਨੇ ਲਿਖਿਆ- ਬਸ ਇੱਕ ਕੁੜੀ ਬੇਅੰਤ ਹਾਸੇ ਅਤੇ ਉਸਦੇ ਗਾਊਨ ਨਾਲ ਬੀਚ ‘ਤੇ।
2021 ਵਿੱਚ ਜੰਮੂ ਤੋਂ ਗੁਰੂਗ੍ਰਾਮ ਸ਼ਿਫਟ ਹੋਈ
ਜਾਣਕਾਰੀ ਅਨੁਸਾਰ ਸਿਮਰਨ ਮੂਲ ਰੂਪ ਤੋਂ ਜੰਮੂ ਦੇ ਨਾਨਕ ਨਗਰ ਦੀ ਰਹਿਣ ਵਾਲੀ ਸੀ। ਕੁਝ ਸਾਲ ਰੇਡੀਓ ਮਿਰਚੀ ਵਿੱਚ ਕੰਮ ਕੀਤਾ। ਫਿਰ ਸਿਮਰਨ ਨੌਕਰੀ ਛੱਡ ਕੇ ਸਾਲ 2021 ਵਿਚ ਗੁਰੂਗ੍ਰਾਮ ਆ ਗਈ। ਇੱਥੇ ਉਸ ਨੇ ਕੁਝ ਦੋਸਤਾਂ ਨਾਲ ਕਿਰਾਏ ’ਤੇ ਮਕਾਨ ਲਿਆ ਹੋਇਆ ਸੀ। ਸਾਰੇ ਦੋਸਤ ਇਸੇ ਕੋਠੀ ਵਿੱਚ ਰਹਿੰਦੇ ਸਨ।
ਇੱਥੇ ਸਿਮਰਨ ਫਰੀਲਾਂਸਰ ਵਜੋਂ ਕੰਮ ਕਰਦੀ ਸੀ। ਉਹ ਸੋਸ਼ਲ ਮੀਡੀਆ ‘ਤੇ ਵੀ ਕਾਫੀ ਐਕਟਿਵ ਰਹਿੰਦੀ ਸੀ। ਉਸ ਦੀਆਂ ਵੀਡੀਓਜ਼ ‘ਤੇ ਲੱਖਾਂ ਵਿਊਜ਼ ਮਿਲਦੇ ਸਨ। ਬੇਟੀ ਨੂੰ ਗੁਆਉਣ ਤੋਂ ਬਾਅਦ ਪਰਿਵਾਰ ਦਾ ਬੁਰਾ ਹਾਲ ਹੈ। ਸਿਮਰਨ ਘਰ ਵਿੱਚ ਆਪਣੇ ਨਾਨੇ ਦੇ ਸਭ ਤੋਂ ਨੇੜੇ ਸੀ। ਮਾਪਿਆਂ ਦੀ ਲਾਡਲੀ ਸਿਮਰਨ ਹੁਣ ਇਸ ਦੁਨੀਆਂ ਨੂੰ ਸਦਾ ਲਈ ਅਲਵਿਦਾ ਕਹਿ ਗਈ ਹੈ। ਉਨ੍ਹਾਂ ਦੀ ਮੌਤ ਨਾਲ ਪੂਰੇ ਜੰਮੂ ‘ਚ ਸੋਗ ਦੀ ਲਹਿਰ ਹੈ।
ਜੰਮੂ ਦੇ ਮੁੱਖ ਮੰਤਰੀ ਨੇ ਦੁੱਖ ਪ੍ਰਗਟ ਕੀਤਾ
ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਅਤੇ ਉਨ੍ਹਾਂ ਦੇ ਪਿਤਾ ਫਾਰੂਕ ਅਬਦੁੱਲਾ ਨੇ ਵੀ ਸਿਮਰਨ ਦੇ ਦੇਹਾਂਤ ‘ਤੇ ਸੋਗ ਪ੍ਰਗਟ ਕੀਤਾ ਹੈ। ਉਹਨਾਂ ਸਾਂਝੇ ਬਿਆਨ ‘ਚ ਕਿਹਾ – ‘ਸਿਮਰਨ ਦੀ ਆਵਾਜ਼ ਅਤੇ ਸੁਹਜ ਜੰਮੂ-ਕਸ਼ਮੀਰ ਦੀ ਭਾਵਨਾ ਨਾਲ ਮੇਲ ਖਾਂਦਾ ਹੈ। ਸਾਡੇ ਖੇਤਰ ਦੇ ਸੱਭਿਆਚਾਰਕ ਤਾਣੇ-ਬਾਣੇ ਵਿੱਚ ਉਨ੍ਹਾਂ ਦੇ ਯੋਗਦਾਨ ਨੂੰ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ।
ਇਹ ਵੀ ਪੜ੍ਹੋ…ਸਾਬਕਾ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਦਾ ਦਿਹਾਂਤ, 7 ਦਿਨਾਂ ਦੇ ਰਾਸ਼ਟਰੀ ਸੋਗ ਦਾ ਐਲਾਨ
25 ਦਸੰਬਰ ਦੀ ਰਾਤ ਨੂੰ ਕਰੀ ਖੁਦਕੁਸ਼ੀ
ਗੁਰੂਗ੍ਰਾਮ ਪੁਲਿਸ ਦੇ ਅਨੁਸਾਰ – ਸਾਨੂੰ ਬੁੱਧਵਾਰ ਰਾਤ ਕਰੀਬ 9.30 ਵਜੇ ਆਰਜੇ ਸਿਮਰਨ ਸਿੰਘ ਦੇ ਇੱਕ ਦੋਸਤ ਦਾ ਫ਼ੋਨ ਆਇਆ, ਜੋ ਉਸੇ ਘਰ ਵਿੱਚ ਰਹਿ ਰਿਹਾ ਸੀ। ਉਸ ਨੇ ਦੱਸਿਆ ਕਿ ਸਿਮਰਨ ਨੇ ਆਪਣੇ ਆਪ ਨੂੰ ਕਮਰੇ ਅੰਦਰ ਬੰਦ ਕਰ ਲਿਆ ਹੈ ਅਤੇ ਦਰਵਾਜ਼ਾ ਨਹੀਂ ਖੋਲ੍ਹ ਰਹੀ। ਜਦੋਂ ਪੁਲਿਸ ਟੀਮ ਘਰ ਪਹੁੰਚੀ ਤਾਂ ਦਰਵਾਜ਼ਾ ਅੰਦਰੋਂ ਬੰਦ ਸੀ। ਪੁਲਸ ਕਿਸੇ ਤਰ੍ਹਾਂ ਕਮਰੇ ਦਾ ਦਰਵਾਜ਼ਾ ਖੋਲ੍ਹ ਕੇ ਅੰਦਰ ਦਾਖਲ ਹੋਈ ਤਾਂ ਕਮਰੇ ‘ਚ ਸਿਮਰਨ ਦੀ ਲਾਸ਼ ਲਟਕਦੀ ਮਿਲੀ। ਸਿਮਰਨ ਕੋਲੋਂ ਕੋਈ ਸੁਸਾਈਡ ਨੋਟ ਨਹੀਂ ਮਿਲਿਆ, ਜਿਸ ਤੋਂ ਉਸ ਦੀ ਖੁਦਕੁਸ਼ੀ ਦਾ ਕਾਰਨ ਪਤਾ ਲੱਗ ਸਕੇ। ਪੁਲੀਸ ਨੇ ਘਰੋਂ ਸਬੂਤ ਆਦਿ ਦੀ ਤਲਾਸ਼ੀ ਲਈ।ਜਿਸ ਤੋਂ ਬਾਅਦ ਲਾਸ਼ ਨੂੰ ਪੋਸਟਮਾਰਟਮ ਲਈ ਮੋਰਚਰੀ ਭੇਜ ਦਿੱਤਾ ਗਿਆ। ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਪਰਿਵਾਰ ਨੂੰ ਸੌਂਪ ਦਿੱਤੀ ਗਈ। ਖੁਦਕੁਸ਼ੀ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ। ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ।
