ਦਿੱਲੀ ਦੇ 40 ਤੋਂ ਵੱਧ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ, ਬੱਚੇ ਭੇਜੇ ਵਾਪਸ

ਨਵੀਂ ਦਿੱਲੀ, 9 ਦਸੰਬਰ 2024 – ਦਿੱਲੀ ਦੇ ਤਿੰਨ ਸਕੂਲਾਂ ਨੂੰ ਸੋਮਵਾਰ ਸਵੇਰੇ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਜਿਸ ਵਿੱਚ ਡੀਪੀਐਸ ਆਰਕੇ ਪੁਰਮ, ਮਯੂਰ ਵਿਹਾਰ ਫੇਜ਼ 1 ਵਿੱਚ ਸਥਿਤ ਮਦਰ ਮੈਰੀ ਸਕੂਲ ਅਤੇ ਪੱਛਮੀ ਵਿਹਾਰ ਵਿੱਚ ਜੀਡੀ ਗੋਇਨਕਾ ਸਕੂਲ ਦੇ ਨਾਮ ਸ਼ਾਮਲ ਹਨ। ਸਵੇਰੇ ਇਹ ਧਮਕੀ ਮਿਲਣ ਤੋਂ ਬਾਅਦ ਸੁਰੱਖਿਆ ਕਾਰਨਾਂ ਕਰਕੇ ਬੱਚਿਆਂ ਨੂੰ ਘਰ ਵਾਪਸ ਭੇਜ ਦਿੱਤਾ ਗਿਆ ਹੈ। ਧਮਕੀ ਭਰਿਆ ਈਮੇਲ ਉਸ ਸਮੇਂ ਦਿੱਤਾ ਗਿਆ ਜਦੋਂ ਬੱਚੇ ਸਕੂਲਾਂ ਵਿੱਚ ਆ ਰਹੇ ਸਨ। ਜਾਣਕਾਰੀ ਅਨੁਸਾਰ ਉਸ ਸਮੇਂ ਸਕੂਲਾਂ ਵਿੱਚ ਸਟਾਫ਼ ਸਵੇਰ ਦੀ ਸਭਾ ਦੀ ਤਿਆਰੀ ਕਰ ਰਿਹਾ ਸੀ। ਇਸ ਸਬੰਧੀ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ।

40 ਤੋਂ ਵੱਧ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ
ਸੋਮਵਾਰ ਸਵੇਰੇ ਖਬਰ ਮਿਲੀ ਸੀ ਕਿ ਦਿੱਲੀ ਦੇ ਤਿੰਨ ਵੱਡੇ ਸਕੂਲਾਂ ਨੂੰ ਬੰਬ ਦੀ ਧਮਕੀ ਮਿਲੀ ਹੈ। ਪਰ ਹੌਲੀ-ਹੌਲੀ ਸਕੂਲਾਂ ਦੀ ਗਿਣਤੀ 40 ਹੋ ਗਈ। NDTV ਦੀ ਰਿਪੋਰਟ ਮੁਤਾਬਕ ਦਿੱਲੀ ਦੇ 40 ਤੋਂ ਵੱਧ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਡੀਪੀਐਸ ਆਰਕੇ ਪੁਰਮ ਅਤੇ ਪੱਛਮੀ ਵਿਹਾਰ ਵਿੱਚ ਜੀਡੀ ਗੋਇਨਕਾ ਸਕੂਲ ਉਨ੍ਹਾਂ 40 ਸਕੂਲਾਂ ਵਿੱਚੋਂ ਸਨ ਜਿਨ੍ਹਾਂ ਨੂੰ ਧਮਕੀਆਂ ਮਿਲੀਆਂ ਸਨ। ਤੁਹਾਨੂੰ ਦੱਸ ਦੇਈਏ ਕਿ ਇਹ ਈਮੇਲ ਐਤਵਾਰ ਰਾਤ ਕਰੀਬ 11:38 ਵਜੇ ਭੇਜੀਆਂ ਗਈਆਂ ਸਨ। ਈਮੇਲ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਇਮਾਰਤਾਂ ਦੇ ਅੰਦਰ ਕਈ ਬੰਬ ਰੱਖੇ ਗਏ ਹਨ।
ਈਮੇਲ ਰਾਹੀਂ ਕੀ ਮੰਗ ਹੈ?
ਰਿਪੋਰਟਾਂ ਮੁਤਾਬਕ ਈਮੇਲ ‘ਚ ਲਿਖਿਆ ਗਿਆ ਸੀ ਕਿ ਬੰਬ ਛੋਟੇ ਅਤੇ ਬਹੁਤ ਚੰਗੀ ਤਰ੍ਹਾਂ ਲੁਕਾ ਕੇ ਰੱਖੇ ਹੋਏ ਹਨ। ਬੰਬ ਨੂੰ ਨਕਾਰਾ ਕਰਨ ਲਈ ਲਗਭਗ 30,000 ਡਾਲਰ (25,41,330.00 ਰੁਪਏ) ਦੀ ਮੰਗ ਕੀਤੀ ਗਈ ਹੈ। ਅੱਗੇ ਲਿਖਿਆ ਗਿਆ ਕਿ ਇਮਾਰਤ ਨੂੰ ਕੋਈ ਜ਼ਿਆਦਾ ਨੁਕਸਾਨ ਨਹੀਂ ਹੋਵੇਗਾ ਪਰ ਬੰਬ ਫਟਣ ਨਾਲ ਬਹੁਤ ਸਾਰੇ ਲੋਕ ਜ਼ਖਮੀ ਹੋਣਗੇ। ਤੁਹਾਨੂੰ ਸਾਰਿਆਂ ਨੂੰ ਦੁੱਖ ਝੱਲਣੇ ਪੈਣਗੇ ਅਤੇ ਆਪਣੇ ਅੰਗ ਵੀ ਗੁਆਉਣੇ ਪੈਣਗੇ। ਦਿੱਲੀ ਪੁਲਿਸ ਆਈਪੀ ਐਡਰੈੱਸ ਦੀ ਜਾਂਚ ਕਰ ਰਹੀ ਹੈ ਅਤੇ ਈਮੇਲ ਭੇਜਣ ਵਾਲੇ ਦੀ ਭਾਲ ਕਰ ਰਹੀ ਹੈ।
ਦਿੱਲੀ ਫਾਇਰ ਵਿਭਾਗ ਨੂੰ ਜੀਡੀ ਗੋਇਨਕਾ ਸਕੂਲ ਤੋਂ ਸਵੇਰੇ 6:15 ਵਜੇ ਪਹਿਲੀ ਕਾਲ ਆਈ। ਇਸ ਤੋਂ ਬਾਅਦ ਸ਼ਾਮ 7:06 ਵਜੇ ਡੀਪੀਐਸ ਆਰਕੇ ਪੁਰਮ ਤੋਂ ਇੱਕ ਹੋਰ ਕਾਲ ਆਈ। ਡੌਗ ਸਕੁਐਡ, ਬੰਬ ਡਿਟੈਕਸ਼ਨ ਟੀਮ ਅਤੇ ਸਥਾਨਕ ਪੁਲਿਸ ਸਮੇਤ ਉੈੱਚ ਅਧਿਕਾਰੀ ਮੌਕੇ ਤੇ ਪਹੁੰਚੇ ਅਤੇ ਤਲਾਸ਼ੀ ਅਭਿਆਨ ਸ਼ੁਰੂ ਕੀਤਾ। ਹਾਲਾਂਕਿ ਪੁਲਿਸ ਨੂੰ ਅਜੇ ਤੱਕ ਕੋਈ ਵੀ ਸ਼ੱਕੀ ਚੀਜ਼ ਨਹੀਂ ਮਿਲੀ ਹੈ।